کچھ عناصر ماضی میں افغانستان کے مخالف رہے اب خطے میں عدم استحکام پیدا کرنے کی کوشش کر رہے ہیں

قوتیں براہ راست سامنے نہیں آتیں ، کسی بھی سازش کے مقابلے میں مضبوطی سے کھڑے ہیں:ذبیح اللہ مجاہد

کابل(مشرق نیوز)افغانستان کی طالبان حکومت کے ترجمان ذبیح اللہ مجاہد نے الزام عائد کیا ہے امریکی ڈرون پاکستان کی فضائی حدود استعمال کرتے ہوئے افغانستان میں داخل ہو رہے ہیں،افغان خبر رساں ادارے طلوع نیوز کو انٹرویو میں ترجمان طالبان نے عمل کو افغانستان کی خودمختاری کی خلاف ورزی قرار دیتے ہوئے احتجاج ریکارڈ کرایا،ذبیح اللہ مجاہد نے دعویٰ کیا جس طرح پاکستان یہ مطالبہ کرتا ہے افغان سرزمین پاکستان کیخلاف استعمال نہ ہو، اسی طرح ہم نے بھی استنبول میں ہونیوالے مذاکرات میں پاکستان سے کہا ہے وہ اپنی زمین اور فضائی حدود افغانستان کیخلاف استعمال نہ ہونے دے،یہ درست ہے کہ امریکی ڈرون افغانستان کی فضاؤں میں داخل ہو رہے ہیں، ڈرونز پاکستانی فضائی حدود سے گزر کر آتے ہیں جو ناقابل قبول ہے، کچھ عناصر جو ماضی میں افغانستان کے مخالف رہے یا بگرام پر قابض ہونے کے خواہاں تھے اب خطے میں عدم استحکام پیدا کرنے کی کوشش کر رہے ہیں،ترجمان طالبان نے کہا قوتیں براہ راست سامنے نہیں آتیں بلکہ دوسروں کے ذریعے اشتعال انگیزی اور دباؤ ڈالتی ہیں، ہم کسی بھی سازش کے مقابلے میں مضبوطی سے کھڑے ہیں اور خطے میں کسی غلط عزائم کو کامیاب نہیں ہونے دیں گے۔