عرب و اسلامی ممالک کی پائیدار جنگ بندی،دیرپا امن کیلئے لائحہ عمل پر مشاورت، غزہ کی تعمیر نو کی فوری ضرورت پر اتفاق

اسحاق ڈار کی ترک ہم منصب سے ملاقات ، سیاسی،معاشی اور دفاعی شعبوں میں تعاون مزید بڑھانے کے عزم کا اعادہ

استنبول(مشرق نیوز)ترکیہ کے شہر استنبول میں غزہ سے متعلق عرب و اسلامی ممالک کے وزرائے خارجہ کے اہم اجلاس کی نمائندگی نائب وزیر اعظم و وزیرخارجہ اسحاق ڈار نے کی اور ایک مرتبہ پھر اصولی مؤقف کا اعادہ کیا ، اسحاق ڈار نے کہا خطے کے مستقل امن کیلئے آزاد اور خود مختار فلسطینی ریاست ناگزیر ہے ، 1967سے قبل کی سرحدوں کے مطابق آزاد،خود مختارفلسطینی ریاست قائم ہو، آزاد فلسطینی ریاست کادارالحکومت القدس الشریف ہوناچاہیے،استنبول اجلاس میں عرب و اسلامی ممالک نے غزہ کی تعمیر نو کی فوری ضرورت پر اتفاق کیا، پاکستان نے اپنا اصولی مؤقف دہراتے ہوئے زور دیا فلسطین مسئلہ اقوام متحدہ اور او آئی سی کی قراردادوں کے مطابق حل ہونا چاہیے، شرکا نے غزہ میں پائیدار جنگ بندی اور دیرپا امن کیلئے لائحہ عمل پر تفصیلی مشاورت کی، اسرائیل کی جانب سے جنگ بندی کی مسلسل خلاف ورزیوں کی مذمت اور فلسطینی عوام کیلئے بلا تعطل فوری انسانی امداد کی فراہمی کا مطالبہ کیا گیا، وزرائے خارجہ اجلاس نے مقبوضہ فلسطینی علاقوں سے اسرائیلی افواج کے انخلا پر زور دیا، اجلاس سے قبل اسحاق ڈار نے ترک وزیرخارجہ ہاکان فیدان سے ملاقات بھی کی، دونوں رہنماؤں نے سیاسی،معاشی اور دفاعی شعبوں میں تعاون مزید بڑھانے کے عزم کا اعادہ کیا،مسئلہ فلسطین خصوصاً غزہ میں پائیدار امن کے قیام کیلئے مشترکہ کوششیں جاری رکھنے کا عزم دہرایا،دونوں رہنماؤں نے فلسطینی عوام کی اخلاقی ، سفارتی اور انسانی حمایت جاری رکھنے سمیت علاقائی و عالمی امور پر قریبی رابطہ برقرار رکھنے پر اتفاق بھی کیا۔