ایک طرف جھوٹا بیانیہ اور دوسری طرف واضح حقائق نے بھارت کے بارے میں دنیا کی آنکھیں کھول دیں

پاکستان خود دہشتگردی کا بڑا شکار ، معرکہ حق میں فضائیہ کا کردار سنہری حروف میں لکھا جائے گا:وزیر اطلاعات

اسلام آباد (بیورورپورٹ)وزیر اطلاعات عطا تارڑ نے کہا بھارت ابھی تک پاکستان کیخلاف سازشوں میں مصروف ہے، ہماری کوسٹ گارڈ نے بھارت کیلئے جاسوسی کرنیوالے ملاح کو گرفتار کیا، ملاح نے بھارتی ایجنسیوں کے ہاتھوں استعمال ہونے کی تمام کہانی دنیا کے سامنے سنائی،صحافیوں سے گفتگو کرتے ہوئے عطا تارڑ نے کہا کوشش اور محنت سے ہم نے سفارتی محاذ پر کامیابیاں حاصل کیں، پاکستان کیلئے سفارتی محاذ پر کام کرنے والوں کی خدمت کو ہمیشہ یاد رکھا جائے گا، دہشتگردی کی وجہ سے سب سے زیادہ نقصان پاکستان نے اٹھایا، دنیا پاکستان کی کامیابیوں کی معترف ہے، پاکستان پر دہشتگردی کو فروغ دینے کا جھوٹا الزام لگایا گیا، پہلگام واقعے کے فوراً بعد پاکستان پر الزام عائد کر دیا گیا، پاکستان خود دہشتگردی کا بڑا شکار ہے، دنیا تسلیم کرتی ہے پاکستان کی فارن سروس سب سے بہترین ہے، فارن سروس کے افسران نے پاکستان کا نام عالمی سطح پر روشن کیا،وزیر اطلاعات نے کہا وزیر اعظم نے بھارت کو پہلگام واقعے پر آزادانہ تحقیقات کی پیشکش کی، دوست ممالک نے بھی پاکستان کے مؤقف کی تائید کی، جب جنگ ہم پر مسلط کی گئی تو ہماری مسلح افواج نے منہ توڑ جواب دیا، فیلڈ مارشل سید عاصم منیر کی قیادت میں ہم نے فتح حاصل کی، معرکہ حق میں ہماری فضائیہ کا کردار سنہری حروف میں لکھا جائے گا،بھارتی میڈیا جھوٹے پروپیگنڈے کا سہارا لے رہا تھا، پاکستان میں ذمہ دارانہ رپورٹنگ نے دنیا کی توجہ حاصل کی، معرکہ حق میں کامیابی کے بعد ہر پاکستانی کا سر فخر سے بلند ہوا، ہم بیانیے کی جنگ لڑ رہے ہیں، ہمارا بیانیہ ایک بھرپور جواب کی صورت میں ہے، ایک طرف جھوٹا بیانیہ اور دوسری طرف واضح حقائق نے بھارت کے بارے میں دنیا کی آنکھیں کھول دیں، وزیراعظم کے دورہ سعودی عرب میں معاشی سٹریٹجک فریم ورک کا اجرا انتہائی اہم پیشرفت ہے، اب ہمارا ہدف ملک میں بیرونی سرمایہ کاری کا فروغ ہے، وسط ایشیائی ریاستوں کے ساتھ مضبوط روابط، تجارت کیلئے پاکستانی بندرگاہوں کا استعمال ترجیح ہے، ہم نے معاشی میدان میں نئی بلندیوں کو چھونا ہے، دوست ملکوں کے ساتھ اقتصادی و تجارتی روابط مزید مضبوط بنانے ہیں۔