پیپلز پارٹی کے ڈیڑھ ہفتے سے عددی برتری کے دعوے ، ہائی کمان نے تاحال متبادل قائد ایوان کی نامزدگی نہیں کی

قبل از وقت انتخابات کا مطالبہ بھی تاخیر کی وجہ ، بلاول کی وطن واپسی پر ہی عدم اعتماد جمع کرانے کا فیصلہ متوقع :ذرائع

مظفرآباد(بیورورپورٹ)پیپلز پارٹی ، ن لیگ کی سیاسی مفادات حاصل کرنے کی دوڑ میں آزاد کشمیر میں ان ہاؤس تبدیلی تاحال تاخیر کا شکار ،ذرائع کے مطابق آزاد جموں و کشمیر اسمبلی میں ان ہاؤس تبدیلی کے معاملے میں پیپلز پارٹی کی ہائی کمان نے تاحال متبادل قائد ایوان کی نامزدگی نہیں کی اور متبادل قائد ایوان کے بغیر تحریک عدم اعتماد جمع ہونے میں مسلسل تاخیر ہو رہی ہے،پیپلز پارٹی عددی برتری کے دعوے کے باوجود ڈیڑھ ہفتے سے برتری ثابت کرنے میں لیت و لعل کا شکار ہے، چیئرمین پیپلز پارٹی بلاول بھٹو زرداری کی وطن واپسی پر ہی عدم اعتماد جمع کرانے کا فیصلہ متوقع ہے،ذرائع کے مطابق مبینہ طور پر مسلم لیگ ن کے قبل از وقت انتخابات منعقد کرانے کا مطالبہ بھی تاخیر کی وجہ ہے، قبل از وقت انتخابات کی صورت میں ان ہاؤس تبدیلی سے پیپلز پارٹی کوسیاسی فائدہ نہیں پہنچ پائے گا۔